முகவை முரசு

வெற்றி எட்டுத் திக்கு மெட்டக் கொட்டு முரசே! வேதம் என்றும் வாழ்க என்று கொட்டு முரசே! ஒன்றென்று கொட்டு முரசே!- அன்பில் ஓங்கென்று கொட்டு முரசே!

Saturday, July 13, 2019

தொடர் மின்வெட்டில் தத்தளிக்கும் ராமநாதபுர மாவட்டம்!!

No comments :


ராமநாதபுரம்:மாவட்டத்தில் 300க்கும் மேற்பட்ட உயர் மின் கோபுரங்களில் மின் கம்பிகளை கட்டி இணைக்கும் இன்சுலேட்டர்கள் டிஸ்க் உடைந்ததால் நேற்று முன்தினம் முதல் ஏராளமான கிராமங்களில் மின்தடை ஏற்பட்டுள்ளது.

சீராக மின்சாரத்தை கடத்தும் வகையில் பல்வேறு பகுதிகளில் உயர் மின்கோபுரங்கள் அமைக்கப்பட்டுள்ளன. அவற்றில் சீரான மின்னழுத்தம் கிடைப்பதற்காக 'இன்சுலேட்டர் டிஸ்க்' பொருத்தப்படுகிறது.
இவற்றை ராமநாதபுரம் மாவட்ட மின்வாரியம் தொடர் பராமரிப்பு செய்யாததால் கடந்த ஜூலை 3ல் வழுதுார், ராமநாதபுரம், கூரியூர் பகுதிகளில் உடைந்தன.
இதனால், ராமேஸ்வரம், ராமநாதபுரம் பகுதியில் இரண்டு நாட்கள் மின்தடை ஏற்பட்டு மக்கள் மிகுந்த சிரமப்பட்டனர். மூன்று நாட்களுக்கு பின் ஜூலை 6ல் மின் விநியோகம் சீரானது.



மாவட்ட தலைநகரான ராமநாதபுரத்தை இரண்டு நாட்கள் இருளில் மூழ்கடித்த நிலையில், நேற்று முன்தினம் (ஜூலை 10) பகலில் வழுதுார் பகுதியில் திடீரென உயர்மின் கோபுரத்தில் ஏராளமான இன்சுலேட்டர் டிஸ்க் அமைப்புகள் உடைந்து சிதறின. இதனால், ராமேஸ்வரம், மண்டபம், கீழக்கரை பகுதியில் மின்தடை ஏற்பட்டது. அவற்றை மின்வாரிய பொறியாளர்கள் நேற்று முன்தினம் இரவு முழுதுவதும் சரிசெய்யும் பணியில் ஈடுபட்டனர். வழுதூர் பகுதியில் பீங்கான் அமைப்புகள் உடைந்த நிலையில், காரைக்குடி செல்லும் மின்தடம், பெருங்குளம் கீழக்கரை செல்லும் மின்தடங்களிலும் 300 க்கும் மேற்பட்ட இடங்களில் இன்சுலேட்டர்கள் சேதமடைந்தன.

இதனால், ராமேஸ்வரம், கீழக்கரை நகராட்சி பகுதிகளும், மண்டபம், பெருங்குளம், காவனுார், வாலிநோக்கம், ஏர்வாடி உள்ளிட்ட பெரும்பாலான ஊரகப் பகுதிகளிலும், பல கிராமங்களில் அறிவிக்கப்படாத மின்தடை ஏற்பட்டது. சுமார் 75 ஆயிரம் மின் இணைப்புகளுக்கு மின்விநியோகம் செய்வது நேற்று தடைபட்டதாக மின்வாரியப் பொறியாளர்கள் தெரிவித்தனர். இன்சுலேட்டர்கள் பழுதுநீக்கும் பணியில் வெளியூர்களில் இருந்து அழைத்து வரப்பட்ட மின்வாரிய ஒப்பந்தப் பணியாளர்கள் நேற்று அதிகாலை முதலே ஈடுபடுத்தப்பட்டுள்ளதாக பொறியாளர்கள் கூறினர்.


செய்தி: தினசரிகள்


(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

Thursday, July 11, 2019

ராமநாதபுரத்தில் கடல் சார்ந்த சிறுதொழில் தொடங்க ரூ.22 கோடியில் உணவுப் பூங்கா!!

No comments :
ராமநாதபுரம் அருகே சக்கரக்கோட்டை ஊராட்சிக்கு உட்பட்ட கிழக்கு கடற்கரை சாலை பகுதியில் தமிழ்நாடு சிறுதொழில் வளர்ச்சி நிறுவனத்தின் சார்பில் ஜப்பான் பன்னோக்கு கூட்டுறவு முகமை உதவியுடன் ஒருங்கிணைந்த கடல் உணவு பூங்கா அமைக்கப்பட்டு வருகிறது. தமிழ்நாடு முதலீடு ஊக்குவிப்பு திட்டம் 2-ன் கீழ் அமைக்கப்பட்டு வரும் இந்த பூங்காவில் கடல் உணவு, மீன் பிடி தொழில் தொடர்பான மேம்படுத்தப்பட்ட கட்டமைப்புகள் ஏற்படுத்தப்பட்டு வருகின்றன.

சுமார் 100 ஏக்கர் பரப்பளவில் ரூ.22 கோடி செலவில் அமைக்கப்பட உள்ள இந்த கடல் உணவு பூங்கா முதல்கட்டமாக 50 ஏக்கரில் அமைக்கப்பட்டு வருகிறது. இந்த 50 ஏக்கரில் 18 தொழில் மனை வளாகங்களை பிரித்து வழங்க தயாராக உள்ளது. இந்த மனை பகுதிகளில் தொழில்தொடங்க ஏதுவாக தொழிற்சாலைகளுக்கான தனி மின் பாதை அமைக்கப்பட்டுள்ளது.

இதுதவிர சாலை வசதி, தண்ணீர் வசதி, மழைநீர் வடிகால் வசதி, வாய்க்கால் வசதி, தெருவிளக்கு வசதிகள் ஏற்படுத்தப்பட்டு வருகின்றன. இந்த கடல் உணவு பூங்காவில் தொழில் தொடங்க தற்போதைய நிலையில் 2 நிறுவனங்கள் விண்ணப்பித்துள்ளன. குறிப்பாக சென்னையை சேர்ந்த நிறுவனம் ஒன்று படகு தயாரிக்கும் தொழில் தொடங்க கடை வளாகம் கேட்டுள்ளது.

இந்த கடல் உணவு பூங்காவில் ஒரு ஏக்கர் பரப்பளவிலான கடை வளாகம் ரூ.23 லட்சம் என விலை நிர்ணயம் செய்யப்பட்டுள்ளது. மனை வளாகம் பெறப்பட்ட 24 மாதங்களுக்குள் தொழில் தொடங்க வேண்டும். இந்த வளாகத்தில் மீன் உணவு வகைகள் தயாரித்தல், மேம்படுத்தப்பட்ட பதப்படுத்தப்பட்ட உடனடி மீன் உணவு வகைகள் தயாரித்தல், மீன்பிடி வலைகள் தயாரிப்பு, படகு தயாரித்தல் போன்ற சிறு,குறு தொழில்கள் தொடங்கலாம்.

தற்போதைய நிலையில் 50 ஏக்கரில் 18 மனை வளாகங்கள் உருவாக்கப்பட்டு வரும் நிலையில் அடுத்த கட்டமாக மீதம் உள்ள 50 ஏக்கரில் இந்த கடல் உணவு பூங்காவை விரிவுபடுத்தும் பணி தொடங்கப்பட உள்ளது.

இதுதவிர இங்கு மீன்கள் பதப்படுத்த ஏதுவாக குளிர்சாதன கிடங்கு வசதியும், கடல் உணவு பூங்காவிற்காக தனி துணை மின்நிலையமும் அமைக்கப்பட உள்ளது.


செய்தி: தினசரிகள்


(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

Thursday, July 4, 2019

ராமநாதபுர மாவட்டத்தில் அதிகரித்து வரும் திருட்டு சம்பவங்கள், திருடர்களை பிடிக்க 3 தனிப்படை அமைக்கப்பு!!

No comments :
ராமநாதபுரம் மாவட்டத்தில் தேர்தலுக்கு பின்னர் கடந்த ஒரு மாதத்தில் வீடு புகுந்து திருட்டு உள்ளிட்ட சம்பவங்கள் நாளுக்கு நாள் அதிகரித்துக்கொண்டே வருகிறது. இதனை தடுக்க சிறப்பு குற்றப்பிரிவை சேர்ந்த 3 தனிப்படை அமைக்கப்பட்டுள்ளது.

மாவட்டத்தில் நடந்த சம்பவங்களின் அடிப்படையில் அதனை செயல்படுத்திய விதம் குறித்து ஆராய்ந்து கடந்த காலங்களில் இதுபோன்று செயல்களில் ஈடுபட்டு கைதான நபர்களின் பட்டியல் தயார் செய்யப்பட்டுள்ளது. இதன்படி 38 குற்றவாளிகளின் பட்டியல் தயார் செய்து தனிப்படையினரிடம் ஒப்படைக்கப்பட்டுள்ளது.

இந்த 38 குற்றவாளிகளின் தற்போதைய நிலை, சிறையில் உள்ளனரா?, எப்போது வெளியில் வந்தனர்?, அதன்பின்னர் வேறு ஏதாவது குற்ற செயல்களில் ஈடுபட்டுள்ளனரா? என்பது குறித்து தீவிர விசாரணை மேற்கொள்ள உத்தரவிடப்பட்டுள்ளது.


இதன்மூலம் முக்கிய தகவல் கிடைக்கும் என்று எதிர்பார்க்கப்படுகிறது. மாவட்டத்தில் கடந்த ஒரு மாதத்தில் மட்டும் வீடு புகுந்து திருட்டு, வீட்டு வாசலில் படுத்திருப்பவர்களிடம் செயின் பறிப்பு என 15 சம்பவங்கள் நடந்துள்ளன. இதனை தடுக்க தீவிர நடவடிக்கை எடுக்கப்பட்டுள்ளது. அதிக வெப்பம் காரணமாக பொதுமக்கள் காற்றுக்காக வெளியில் படுக்கின்றனர். இவர்களை நோட்டமிட்டு மர்ம நபர்கள் செயின் பறிப்பில் ஈடுபட்டு வருகின்றனர்.

காற்றுக்காக வெளியில் படுப்பவர்கள் தங்க நகைகளை அணிந்து கொண்டு படுக்க வேண்டாம் என்பது போன்ற எச்சரிக்கை வாசகங்கள் அச்சடிக்கப்பட்டு கிராமங்கள் தோறும் வினியோகிக்க நடவடிக்கை எடுக்கப்பட்டுள்ளது. இதுதவிர வீடுகளில் பொருத்தப்பட்டுள்ள கதவுகளின் உறுதித்தன்மையை சரிசெய்து கொள்ள வேண்டும். விலை உயர்ந்த பொருட்களை வங்கி பெட்டகத்தில் வைக்க வேண்டும். வீட்டிற்கு வரும் நபர்களை உறுதிசெய்த பின்னரே கதவை திறந்து அனுமதிக்கும் வகையில் கதவில் துளைஅமைத்து சங்கிலியால் கட்டி வைத்து கொள்ள வேண்டும். வீட்டில் தேவையான இடங்களில் கண்காணிப்பு கேமராக்கள் பொருத்திக்கொள்ள வேண்டும் என்பதுபோன்ற அறிவுரைகள் அடங்கிய விளம்பர பலகைகள் முக்கிய இடங்களில் மக்களின் பார்வைக்காக வைக்கப்பட்டுள்ளது. இந்த தகவலை ராமநாதபுரம் மாவட்ட போலீஸ் சூப்பிரண்டு ஓம்பிரகாஷ்மீனா தெரிவித்தார்


(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

Wednesday, June 26, 2019

ராமநாதபுரத்தில் வரும் 28 ஆம் தேதி விவசாயிகள் குறை தீர் கூட்டம்!!

No comments :
ராமநாதபுரத்தில் வரும் 28 ஆம் தேதி (வெள்ளிக்கிழமை) விவசாயிகள் குறை தீர்க்கும் கூட்டம் நடைபெறவுள்ளது என அறிவிக்கப்பட்டுள்ளது.

இதுகுறி மாவட்ட ஆட்சியர் கொ.வீரராகவராவ் செவ்வாய்க்கிழமை வெளியிட்ட செய்திக்குறிப்பு:



ராமநாதபுரம் மாவட்டத்தில் ஜூன் மாதத்திற்கான விவசாயிகள் குறைதீர்க்கும் நாள் கூட்டம் வரும் 28 ஆம் தேதி பகல் 11.30 மணிக்கு நடைபெறுகிறது. ராமநாதபுரம் மாவட்ட ஆட்சியர் அலுவலகத்தில் உள்ள ஊராட்சி மன்றக் கூட்ட அரங்கில் மாவட்ட ஆட்சியர் தலைமையில் இந்தக் கூட்டம் நடைபெறவுள்ளது.


இக்கூட்டத்தில் விவசாயிகளும், விவசாய சங்கப் பிரதிநிதிகளும் கலந்து கொள்ளலாம். இதில் விவசாயம் சம்பந்தமான கோரிக்கைகள் மட்டுமே பரிசீலனைக்கு எடுத்துக் கொள்ளப்படும் எனக்குறிப்பிடப்பட்டுள்ளது.

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

Tuesday, June 25, 2019

ராமேசுவரம் கோவிலில் ரூ.78 லட்சம் கையாடல்; போலீஸ் விசாரணைக்கு உத்தரவு!!

No comments :
ராமேசுவரம் ராமநாதசாமி கோவிலில் சுமார் 100 பேர் நிரந்தர ஊழியர்களாக உள்ளனர். இவர்களது சம்பளத்தில் தொழிலாளர் சேமநல நிதியாக ஒரு தொகை பிடித்தம் செய்யப்பட்டு ஸ்டேட் வங்கியில் அதற்கான கணக்கில் செலுத்தப்படுவது வழக்கம்.

இவ்வாறு கோவில் ஊழியர்களின் சம்பளத்தில் பிடித்தம் செய்யப்பட்டு ஒவ்வொரு மாதமும் ரூ.5 லட்சத்து 12 ஆயிரம் பாரத ஸ்டேட் வங்கியில் செலுத்தப்பட்டு வந்தது. இந்த நிலையில் கடந்த 3 ஆண்டுகளாக குறைவான தொகை செலுத்தப்படுவதாகவும், அதற்கான விளக்கத்தை அளிக்குமாறும் கேட்டு வருங்கால வைப்பு நிதித்துறை அதிகாரிகள் கோவில் இணை ஆணையருக்கு தபால் அனுப்பி உள்ளனர்.

இதனைத் தொடர்ந்து இணை ஆணையர் கல்யாணி சம்பந்தப்பட்ட அலுவலரை அழைத்து விளக்கம் கேட்டபோது மாதந்தோறும் அந்த தொகையை செலுத்தியதற்கான ரசீது இணைக்கப்பட்டிருந்தது.
இதையடுத்து ஸ்டேட் வங்கியில் விசாரித்தபோது, சுமார் 3½ ஆண்டுகளாக ரூ.5 லட்சத்து 12 ஆயிரம் செலுத்துவதற்கு பதிலாக ரூ.3 லட்சத்து 20 ஆயிரம் மட்டுமே செலுத்தப்பட்டிருந்தது தெரியவந்தது.



இதனால் அதிர்ச்சியடைந்த அதிகாரிகள் ஏற்கனவே இணைக்கப்பட்டிருந்த ரசீதுகளை சரிபார்த்த போது அது போலியானவை என்பது தெரியவந்தது.

மேலும் விசாரணையில், கோவில் அலுவலகத்தில் கம்ப்யூட்டர் ஆபரேட்டராக பணியாற்றிய தற்காலிக ஊழியர் சிவன் அருள்குமார் இந்த மோசடியில் ஈடுபட்டிருப்பதாக கூறப்படுகிறது. இவரது தந்தை இக்கோவிலில் பணியாற்றி ஓய்வு பெற்றவர். மொத்தம் ரூ.78 லட்சம் கையாடல் செய்யப்பட்டிருப்பது விசாரணையில் தெரியவந்துள்ளது.
இதைத்தொடர்ந்து இணை ஆணையர் கல்யாணி இது குறித்து ராமநாதபுரம் மாவட்ட போலீஸ் சூப்பிரண்டு ஓம்பிரகாஷ் மீனாவை சந்தித்து புகார் அளித்துள்ளார்.

அவர் இது குறித்து விசாரணை நடத்த குற்றப்பிரிவு போலீசாருக்கு உத்தரவிட்டார்.


செய்தி: தினசரிகள்

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

Monday, June 10, 2019

ராமநாதபுரத்தில் வரும் 15-ந் தேதி வேலைவாய்ப்பு முகாம்!!

No comments :
ராமநாதபுரத்தில் மாவட்ட வேலைவாய்ப்பு அலுவலகம் சார்பில் வரும் 15-ந் தேதி தனியார் துறை வேலைவாய்ப்பு முகாம் நடைபெற உள்ளது.

தகவல் தொழில்நுட்பவியல்துறை அமைச்சர் டாக்டர் மணிகண்டன் தலைமையில் ராமநாதபுரம் மாவட்ட வேலைவாய்ப்பு அலுவலகம் சார்பாக வரும் 15.06.2019 சனிக்கிழமை அன்று ராமநாதபுரம் ரோமன் சர்ச் பேருந்து நிறுத்தம் அருகில் உள்ள இன்பேன்ட் ஜீஸஸ் மெட்ரிக் மேல்நிலைப் பள்ளியில்; காலை 9.00 மணி முதல் மாலை 3.00 மணி வரை தனியார்துறை சிறப்பு வேலைவாய்ப்பு முகாம் நடைபெற உள்ளது. 

இத்தனியார்துறை வேலைவாய்ப்பு முகாமில் 50-க்கும் மேற்பட்ட பல்வேறு நிறுவனங்கள் மற்றும் உள்ளூர் நிறுவனங்களும் கலந்துகொண்டு வேலை நாடுநர்களை தெரிவு செய்ய இருக்கின்றன. 

இம்மாவட்டத்தைச் சார்ந்த வேலைவாய்ப்பற்ற 8-ம் வகுப்பு தேர்ச்சி முதல் பட்டப்படிப்பு வரை மற்றும் ஐ.டி.ஐ., டிப்ளமோ மற்றும் பொறியியல் மற்றும் பட்டதாரி ஆசிரியர் மற்றும் செவிலியர் மற்றும் லேப் டெக்னீசியன் கல்வித்தகுதியுடைய அனைவரும் இம்முகாமில் கலந்துகொண்டு தங்களுக்கான பணியினை தாங்களே தேர்வு செய்வதற்கான அரிய வாய்ப்பினை பயன்படுத்திக்கொள்ளுமாறு கேட்டுக்கொள்ளப்படுகிறார்கள்.

மேலும், ராமநாதபுரம் மாவட்டத்திலுள்ள தனியார்துறை நிறுவனங்கள், இம்முகாமில் கலந்துகொண்டு தங்களுக்கு தேவையான பணியாளர்களை தெரிவு செய்து கொள்ளலாம்.

எனவே, தங்களது முழு பயோடேட்டா, அனைத்து அசல் கல்விச்சான்றுகள், குடும்ப அட்டை, ஆதார் அட்டை மற்றும் பாஸ்போர்ட் அளவு புகைப்படம் ஆகியவற்றுடன் இத்தனியார்துறை சிறப்பு வேலைவாய்ப்பு முகாமில் கலந்துகொண்டு பயனடையலாம்.

இந்த முகாம் மூலம் பணிக்கு நீங்கள் தேர்வு செய்யப்பட்டு பணியமர்த்தம் செய்யப்பட்டால் தங்களின் வேலைவாய்ப்பு அலுவலக பதிவு எக்காரணத்தைக்கொண்டும் இரத்து செய்யப்படமாட்டாது.  அரசு துறைகளில் கோரப்படும் பணியிடங்களுக்கு அரசு விதிமுறைகளின்படி தங்கள் பெயர் பரிந்துரை செய்ய பரிசீலிக்கப்படும்.


இந்த தகவலை ராமநாதபுரம் மாவட்ட கலெக்டர் வீரராகவராவ் தெரிவித்துள்ளார்.

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

Tuesday, May 28, 2019

இராமநாதபுரத்தில் காவல்துறை பணிகளுக்க்கான இலவச முழு மாதிரித் தேர்வு!!

No comments :
தமிழகத்தில் காவல்துறை பணிகளுக்கு நடைபெறும் தேர்வுகளுக்கான இலவச முழு மாதிரித் தேர்வு நடைபெறவுள்ளதால் விருப்பமுள்ளோர் அதில் பங்கேற்கலாம் என சுரேஷ் அகாதெமி நிறுவனர் து,சுகேஷ்சாமுவேல் தெரிவித்துள்ளார்.

இதுகுறித்து அவர் திங்கள்கிழமை விடுத்துள்ள செய்திக்குறிப்பு:



சுரேஷ் அகாதெமி சார்பில் ராமநாதபுரம் மாவட்டத்தில் கடந்த 3 ஆண்டுகளாக ஏராளமானோர் அரசுப் பணிக்குச் செல்ல உதவியுள்ளோம்.
இந்த நிலையில், தற்போது காவல் துறையில் சார்பு ஆய்வாளர் உள்ளிட்ட பணிகளுக்கு தேர்வு நடைபெறவுள்ளது. ஆகவே அத்தேர்வுக்கு தயாராகும் வகையில் வரும் ஜூன் 2 ஆம் தேதி (ஞாயிறு) தமிழகம் முழுதும் சுரேஷ் அகாதெமி சார்பில் இலவச முழு மாதிரி தேர்வு நடைபெறவுள்ளது.
அத்துடன் டிஎன்பிஎஸ்சி குரூப் 2ஏ பதவிக்கான இலவச அறிமுக வகுப்புகளும் ஜூன் 9 ஆம் தேதி காலை 9 மணிக்குத் தொடங்குகிறது. இதில் இலவச பாடக்குறிப்புகள், நடப்பு நிகழ்வுகள் வழங்கப்படும்.


மேலும் விவரங்களுக்கு தொடர்பு கொள்ள 75503 52916 மற்றும் 75503 52917 ஆகிய செல்லிடப் பேசிகளில் தொடர்பு கொள்ளலாம் எனக்குறிப்பிடப்பட்டுள்ளது.

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Saturday, May 25, 2019

ராமநாதபுரம் நாடாளுமன்ற மக்கள் பிரதிநிதி திரு.நவாஸ்கனி!!

No comments :
ராமநாதபுரம் நாடாளுமன்ற தொகுதியில் தி.மு.க. தலைமையிலான மதச்சார்பற்ற முற்போக்கு கூட்டணி சார்பில் இந்திய யூனியன் முஸ்லிம் லீக் வேட்பாளர் நவாஸ்கனி போட்டியிட்டார்.

இதேபோல பா.ஜ.க. சார்பில் நயினார் நாகேந்திரன், அ.ம.மு.க. சார்பில் வது.ந.ஆனந்த், நாம் தமிழர் கட்சி சார்பில் புவனேசுவரி, மக்கள் நீதி மய்யம் சார்பில் விஜயபாஸ்கர் உள்பட மொத்தம் 23 வேட்பாளர்கள் போட்டியிட்டனர். இதில் மொத்தம் 10 லட்சத்து 60 ஆயிரத்து 802 வாக்குகள் பதிவாகின. அதனை தொடர்ந்து வாக்கு எண்ணிக்கை நேற்று முன்தினம் ராமநாதபுரம் அண்ணா பல்கலைக்கழக பொறியியல் கல்லூரி வளாகத்தில் நடைபெற்றது.


வாக்கு எண்ணிக்கை தொடங்கியது முதல் தி.மு.க. கூட்டணி வேட்பாளர் நவாஸ்கனி தொடர்ந்து முன்னிலை வகித்து வந்தார். இதனால் உற்சாகமடைந்த தி.மு.க. மற்றும் கூட்டணி கட்சி நிர்வாகிகள், தொண்டர்கள் தொகுதியின் பல்வேறு இடங்களில் பட்டாசுகள் வெடித்து தங்களது மகிழ்ச்சியை வெளிப்படுத்தினர்.

ராமநாதபுரம் தொகுதியின் வாக்கு எண்ணிக்கை நள்ளிரவு 1 மணி வரை நடந்தது. தி.மு.க. கூட்டணி கட்சி வேட்பாளர் நவாஸ்கனி 1 லட்சத்து 27 ஆயிரத்து 122 வாக்குகள் வித்தியாசத்தில் வெற்றி பெற்றார். அவர் வெற்றி பெற்றதற்கான சான்றிதழை மாவட்ட தேர்தல் அதிகாரி வீரராகவ ராவ் வழங்கினார். இதையடுத்து கூட்டணி கட்சி நிர்வாகிகளும், தொண்டர்களும் பட்டாசு வெடித்தும், கோ‌ஷங்களை எழுப்பியும் உற்சாகத்துடன் மகிழ்ச்சியை கொண்டாடினர். மேலும் அவருக்கு சால்வை அணிவித்து வாழ்த்துக்களை தெரிவித்தனர்.


கடந்த 1967–ம் ஆண்டு நடைபெற்ற நாடாளுமன்ற தேர்தலில் ராமநாதபுரம் தொகுதியில் போட்டியிட்ட இந்திய யூனியன் முஸ்லிம் லீக் வேட்பாளர் எஸ்.எம்.சரீப் தராசு சின்னத்தில் போட்டியிட்டு வெற்றி பெற்றார். அதன் பிறகு கடந்த 52 ஆண்டுகளுக்கு பின்னர் ராமநாதபுரம் தொகுதியில் தி.மு.க. கூட்டணியில் இடம் பெற்ற இந்திய யூனியன் முஸ்லிம் லீக் வேட்பாளர் நவாஸ்கனி வெற்றி பெற்றுள்ளது குறிப்பிடத்தக்கது.


(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Wednesday, May 22, 2019

ராமநாதபுரம் மக்களவைத் தொகுதிக்கு 139 சுற்றுகளாக வாக்கு எண்ணிக்கை!!

No comments :
ராமநாதபுரம் மக்களவைத் தொகுதிக்கு 139 சுற்றுகளாக வாக்கு எண்ணிக்கை நடைபெறும் என மாவட்ட ஆட்சியரும், தேர்தல் அலுவலருமான கொ.வீரராகவராவ் தெரிவித்தார்.

ராமநாதபுரம் மக்களவைத் தொகுதி வாக்கு எண்ணிக்கை குறித்து அவர் செய்தியாளர்களிடம் செவ்வாய்க்கிழமை மாலை கூறியதாவது:

ராமநாதபுரம் மக்களவைத் தொகுதி, பரமக்குடி சட்டப்பேரவைத் தொகுதிக்கான வாக்கு எண்ணிக்கை வரும் வியாழக்கிழமை (மே 23) காலை 8 மணி முதல் ராமநாதபுரம் அண்ணா பல்கலைக்கழக பொறியியல் கல்லூரியில் நடைபெறவுள்ளது. மக்களவைத் தொகுதியின் வா கு எண்ணிக்கையானது, 6 சட்டப் பேரவைத் தொகுதிகள் வாரியாக அந்தந்த உதவி தேர்தல் நடத்தும் அலவலர் கண்காணிப்பிலும், பரமக்குடி சட்டப்பேரவை தொகுதி இடைத்தேர்தல் வாக்கு எண்ணிக்கை பரக்குடி வருவாய் கோட்டாட்சியர் கண்காணிப்பிலும் நடைபெறும். 8 மணிக்கு தபால் வாக்குகள் எண்ணப்பட்டு, தொடர்ந்து மின்னணு வாக்குப்பதிவு இயந்திரத்தில் பதிவான வாக்குகள் எண்ணப்படும். ஒவொரு சட்டப்பேரவைத் தொகுதிக்கும் தலா 14 மேஜைகள் அமைக்கப்பட்டுள்ளன. ஒவ்வொரு மேஜையிலும் வாக்கு எண்ணிக்கை கண்காணிப்பாளர், நுண் பார்வையாளர், உதவியாளர் என் அலுவலர்கள் வீதம் 42 அலுவலர்கள் பணியில் இருப்பர். அறந்தாங்கி, திருச்சுழி சட்டப் பேரவைத் தொகுதிகளுக்கு தலா 20 சுற்றுகள், பரமக்குடி தொகுதிக்கு 22 சுற்றுகள், ராமநாதபுரம் தொகுதிக்கு 24 சுற்றுகள், திருவாடானை தொகுதிக்கு 25 சுற்றுகள், முதுகுளத்தூர் தொகுதிக்கு 28 சுற்றுகள் என முறையே வாக்கு எண்ணும் பணிகள் மேற்கொள்ளப்படவுள்ளன.


வாக்கு எண்ணும் பணியில் 3000 ஊழியர்கள் ஈடுபடவுள்ளனர். ஒவ்வொரு சுற்றும் சுமார்45 நிமிடங்கள் நடந்து முடிவுகள் அறிவிக்கப்படும்.


மின்னணு வாக்குப்பதிவு இயந்திரத்தில் பதிவான வாக்குகளை எண்ணும் பணிகள் நிறைவு பெற்றவுடன், தேர்தல் ஆணையம் அறிவுறுத்தியுள்ளபடி, வாக்காளர் சரிபார்க்கக்கூடிய இயந்திரத்திலுள்ள ஒப்புகைச் சீட்டுகளை (விவிபேட்) எண்ணும் பணிகள் நடைபெறும். அதன் பிறகே இறுதி முடிவுகள் அறிவிக்கப்படும். மையத்துக்குள் செல்லிடப் பேசி உள்ளிட்டவற்றுக்கு அனுமதியில்லை என்றார்.

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

தனியார் பள்ளிகள் மே 31 ஆம் தேதிக்குள் அரசு அங்கீகாரத்தை புதுப்பிக்கவேண்டும்!!

No comments :


தனியார் பள்ளிகள் வரும் மே 31 ஆம் தேதிக்குள் அரசு அங்கீகாரத்தை புதுப்பிக்கவேண்டும் என ராமநாதபுரம் மாவட்ட முதன்மைக் கல்வி அலுவலர் பி.அய்யணன் தெரிவித்தார்.

ராமநாதபுரம் மாவட்ட முதன்மைக் கல்வி அலுவலருடன், தனியார் பள்ளி முதல்வர்கள் கலந்தாய்வுக் கூட்டம் வொய்க்கிழமை நடைபெற்றது.

ஆட்சியர் அலுவலக வளாகத்தில் உள்ள முகமது சதக் தஸ்தகீர் பள்ளி வளாகத்தில் நடைபெற்ற கூட்டத்துக்கு மாவட்ட முதன்மைக் கல்வி அலுவலர் பி.அய்யணன் தலைமை வகித்தார். தனியார் பள்ளிகளைச் சேர்ந்த ஏராளமான தலைமை ஆசிரியர்கள், பள்ளி முதல்வர்கள் கலந்துகொண்டனர்.


கூட்டத்தில் முதன்மைக் கல்வி அலுவலர் பி.அய்யணன் கூறியது:

தனியார் பள்ளிகள் வரும் மே 31 ஆம் தேதிக்குள் அரசு அங்கீகாரத்தை புதுப்பிக்கவேண்டும். இணையதள வழியிலோ, மாவட்ட முதன்மைக் கல்வி அலுவலகம் மூலமோ அங்கீகாரத்துக்கு புதுப்பிக்கவும், புதிதாக அங்கீகாரம் பெறவும் விண்ணப்பிக்கலாம்.


மாவட்டத்தில் 17 பள்ளிகள் அங்கீகாரத்தை பெறும் நிலை உள்ளது. வரும் 28 ஆம் தேதி பள்ளி வாகனங்களுக்கான பரிசோதனை நடத்தப்படவுள்ளது. ஆகவே பள்ளி வாகன ஓட்டுநர்களுடன், உதவியாளர் ஒருவரும் கட்டாயம் பரிசோதனைக்கு வரவேண்டும் என்றார்.


(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Tuesday, May 14, 2019

ராமநாதபுரம் அருகே நகை திருட்டு, வழக்கு பதிவு செய்து விசாரனை!!

No comments :
ராமநாதபுரம் அருகே உள்ள சூரங்கோட்டை குறிஞ்சிநகரை சேர்ந்த நாகராஜன் என்பவரின் மனைவி ஜெயந்தி(வயது34). இவர் வீட்டை பூட்டிவிட்டு களை எடுக்க சென்றுவிட்டாராம். இந்த சமயம் பார்த்து வீட்டு பூட்டை உடைத்து உள்ளே புகுந்த மர்ம நபர்கள் படுக்கை அறையில் உள்ள பீரோவில் வைக்கப்பட்டிருந்த பவுன் தங்க நகைகளை திருடிக்கொண்டு சென்றுவிட்டனர்.

திரும்பி வந்து பார்த்தபோதுதிருடு போயிருப்பதை அறிந்த ஜெயந்தி அதிர்ச்சி அடைந்து இதுகுறித்து ராமநாதபுரம் பஜார் போலீசில் புகார் செய்தார். அதன்பேரில் போலீசார் வழக்குபதிவு செய்து விசாரித்து வருகின்றனர்.



இதேபோல, குறிஞ்சிநகரை சேர்ந்தவர் மாரி என்பவரின் மனைவி சிவகாமி. இவர் வீட்டைபூட்டிவிட்டு வெளியூர் சென்றிருந்தார். இந்நிலையில் வீட்டுக்குள் புகுந்த மர்ம நபர்கள் பீரோவில் வைக்கப்பட்டிருந்த 20¼ பவுன் நகையை திருடிச் சென்றுவிட்டனர்.

திரும்பிவந்து பார்த்தபோது நகை திடுபோயிருப்பதை கண்டு அதிர்ச்சி அடைந்த சிவகாமி இதுகுறித்து ராமநாதபுரம் பஜார் போலீசில் புகார் செய்தார். போலீசார் வழக்குப்பதிவு செய்து விசாரித்து வருகின்றனர். அடுத்தடுத்த வீடுகளில் நடைபெற்ற இந்த தொடர் திருட்டு சம்பவம் பெரும் பரபரப்பை ஏற்படுத்தி உள்ளது.


செய்தி: தினத்தந்தி

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Tuesday, April 30, 2019

மாநில அளவில் இரண்டாமிடம் பெற்று இராமநாதபுரம் சாதனை!!

No comments :


பத்தாம் வகுப்பு அரசு பொதுத்தேர்வு முடிவுகளில் ராமநாதபுரம் மாவட்டம் 98.48 தேர்ச்சி சதவீதம் பெற்று மாநில அளவில் இரண்டாமிடம் பெற்றது.


ராமநாதபுரம் மாவட்டத்தில் தேர்வு எழுதியவர்களில் 8,081 மாணவர்களும், 8,289 மாணவிகளும் என மொத்தம் 16,370 பேர் தேர்ச்சி பெற்றுள்ளனர். மாணவர்களில் 159 பேரும், மாணவிகளில் 94 பேரும் தேர்ச்சி பெறவில்லை.

மாணவர்களின் தேர்ச்சி 98.07 சதவீதம் ஆகவும், மாணவிகளின் தேர்ச்சி சதவீதம் 98.88 சதவீதம் ஆகவும், ஒட்டுமொத்த தேர்ச்சி சதவீதம் 98.48 பெற்று மாநில அளவில் இரண்டாமிடம் பெற்றுள்ளது.



மாவட்டத்திலுள்ள 255 பள்ளிகளில் மொத்தம் 178 பள்ளிகள் 100 சதவீதம் தேர்ச்சி பெற்றுள்ளன. 131 அரசுப் பள்ளிகளில் மட்டும் கணக்கிடும் போது 94 அரசுப்பள்ளிகள் 100 சதவீத தேர்ச்சி பெற்றுள்ளன. தேர்வெழுதிய அரசுப்பள்ளிகளை சேர்ந்த 5,757 மாணவ, மாணவிகளில் 5,657 பேர் தேர்ச்சி பெற்று அரசுப்பள்ளிகளில் 98.26 சதவீதம் பெற்று மாநில அளவில் முதலிடம் பெற்றுள்ளது.


தேர்வெழுதிய 62 மாற்றுத்திறன் கொண்ட மாணவர்களில் 58 நபர்கள் தேர்ச்சி பெற்றுள்ளனர்.

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Thursday, April 18, 2019

தேர்தல் திருவிழா!! மக்கள் உற்சாக வாக்களிப்பு! ராமநாதபுரம் வேட்பாளர்களும் வாக்களித்தனர்!!

No comments :
தேர்தல் திருவிழா!! மக்கள் உற்சாக வாக்களிப்பு! ராமநாதபுரம் வேட்பாளர்களும் வாக்களித்தனர்!!

தமிழகத்தில் மாலை 5 மணி வரை 63.73% வாக்கு பதிவு>

ராமநாதபுர வேட்பாளர்கள் ;-

திமுக கூட்டணி சார்பில் இந்திய யூனியன் முஸ்லிம் லீக் வேட்பாளர் நவாஸ் கனி போட்டியிடுகிறார். அவர் சாயல்குடி குறுவாடி ஊராட்சி ஒன்றிய துவக்கப் பள்ளியில் வாக்களித்தார்.




அமமுக வேட்பாளர் வதுந ஆனந்த் மனக்குடியில் உள்ள பியு நடுநிலைப்பள்ளியில் வககளித்தார்.



ராமநாதபுரம் மக்களவைத் தேர்தலில் பாஜக சார்பில் போட்டியிடும் நயினார் நாகேந்திரன் . இவர் தனது சொந்த ஊரான திருநெல்வேலியில் வாக்களித்தார்.


ராமநாதபுர தொகுதி பாராளமன்ற பிரதிநிதி யாரென்று, மே-23ம் தேதி தெரியவரும்.




(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Tuesday, April 16, 2019

ராமநாதபுரம் தொகுதி வேட்பாளர்களின் சொத்து, வழக்குகள் அடங்கிய மொத்த விபரம் - வீடியோ!!

No comments :
ராமநாதபுரம் தொகுதி வேட்பாளர்களின் சொத்து, வழக்கு அடங்கிய மொத்த விபரம் - வீடியோ!!

அறப்போர் இயக்கம் வழ்ங்கும் சிறப்பு காணோளி:-


சிந்திப்பீர்! வாக்களிப்பீர்!!

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;

ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

இன்று(16-4-2019) மாலை 6 மணியுடன் ஓய்கிறது தேர்தல் பிராச்சாரம்!!

No comments :


ராமநாதபுரம் மாவட்ட கலெக்;டர் அலுவலக கூட்டரங்கில் மாவட்ட தேர்தல் அலுவலர் கொ.வீர ராகவ ராவ் தலைமையில், நாடாளுமன்ற மக்களவை பொதுத்தேர்தல் -2019 தொடர்பாக மாவட்ட நிர்வாகத்தின் மூலம் மேற்கொள்ளப்பட்டுள்ள முன்னேற்பாடு பணிகள் குறித்த செய்தியாளர்கள் சந்திப்பு நடைபெற்றது.

அப்போது அவர்கூறியதாவது:-

ராமநாதபுரம் மாவட்டத்தில் ராமநாதபுரம் நாடாளுமன்ற தொகுதிக்கான பொதுத்தேர்தல் மற்றும் பரமக்குடி சட்டமன்ற தொகுதிக்கான இடைத்தேர்தல் நடைபெறுவதையொட்டி மாவட்ட நிர்வாகத்தின் மூலம் அனைத்து முன்னேற்பாடு பணிகளும் மேற்கொள்ளப்பட்டுள்ளது. 

ராமநாதபுரம் பாராளுமன்ற தொகுதியில் மொத்தம்; 1,916 வாக்குச்சாவடி மையங்கள் அமைக்கப்பட்டுள்ளன.  அனைத்து வாக்குச்சாவடி மையங்களிலும் குடிநீர் வசதி, கழிப்பறை வசதி, மின்சார வசதி உள்ளிட்ட அனைத்து அடிப்படை வசதிகளும், மாற்றுத்திறனாளிகள், மூத்த குடிமக்கள் சிரமமின்றி வாக்களித்திட ஏதுவாக சாய்வுதள வசதி, சக்கர நாற்காலி வசதி போன்ற சிறப்பு வசதிகளும் ஏற்படுத்தப்பட்டுள்ளன.  

வாக்காளர்கள் எண்ணிக்கையினை பொறுத்தவரையில்
7,75,765 ஆண் வாக்காளர்களும்,
7,82,063 பெண் வாக்காளர்களும்,
82 மூன்றாம் பாலின வாக்காளர்களும்
என மொத்தம் 15,57,910 வாக்காளர்கள் உள்ளனர். 

வாக்காளர்களுக்கு புகைப்படத்துடன் கூடிய வாக்காளர் சீட்டு  விநியோகிக்கும் பணிகள் நடைபெற்று வருகின்றன. 



அதேபோல, இராமநாதபுரம் பாராளுமன்ற தொகுதியில் இராணுவ படைவீரர்கள் 1,830 மின்னணு தபால் வாக்குச்சீட்டுகளும் தேர்தல் பணியில் ஈடுபடும் வாக்குச்சாவடி அலுவலர்களுக்கு 5,310 தபால் வாக்கு சீட்டுகளும், 3,253 நபர்களுக்கு தேர்தல் பணி சான்றிதழ் வழங்கிட நடவடிக்கை மேற்கொள்ளப்பட்டுள்ளது.  

தேர்தல் வாக்குப்பதிவிற்காக 6 சட்டமன்ற தொகுதிகளுக்கு மொத்தம் 4,577 வாக்குச்செலுத்தும் கருவிகளும், 2,299 வாக்குப்பதிவு இயந்திரங்களும்;, 2,499 வாக்காளர் சரிபார்க்கக்கூடிய இயந்திரங்களும் ஒதுக்கீடு செய்யப்பட்டு, அனைத்து மின்னணு வாக்குப்பதிவு இயந்திரங்களிலும் வேட்பாளர்களது பெயர் மற்றும் சின்னம் பொருத்தும் பணிகள் நிறைவேற்றப்பட்டு அந்தந்த சட்டமன்ற தொகுதி வாரியாக தேர்வு செய்யப்பட்டுள்ள பாதுகாப்பு அறைகளில் தயார் நிலையில் வைக்கப்பட்டுள்ளன.

792
வாக்குச்சாவடி மையங்களில் வெப்கேமரா முறையில் கண்காணிக்கப்படவுள்ளது. 

தேர்தல் பாதுகாப்பு பணிகளுக்காக 3 கம்பெனி துணை ராணுவ படையினரும், 200-க்கும் மேற்பட்ட தமிழ்நாடு சிறப்பு காவல்படை வீரர்களும் வருகை தந்துள்ளனர்.

இந்திய தேர்தல் ஆணையத்தின் அறிவுறுத்தலின்படி, வாக்குப்பதிவு நிறைவிற்கு 48 மணி நேரத்திற்கு முன்பாக அனைத்து அரசியல் கட்சி பிரதிநிதிகள் வேட்பாளர்கள் தங்களது தேர்தல் பிரச்சாரங்களை முடித்துக் கொள்ள வேண்டும். 

அதன்படி, 16.04.2019 மாலை 6 மணிக்கு மேல் அரசியல் கட்சி பிரதிநிதிகள் வேட்பாளர்கள் எவ்விதமான பிரச்சார நடவடிக்கைகளில் ஈடுபடுவதற்கு அனுமதி இல்லை. 


இதனை மீறுபவர்கள் மீது சட்டப்படி வழக்குப்பதிவு செய்து கடுமையான நடவடிக்கை எடுக்கப்படும். இவ்வாறு கூறினார். 

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Sunday, April 14, 2019

ராமநாதபுரம் முன்னாள் எம்.பி. ஜே.கே.ரித்தீஷ் மரணம்; ஆழ்ந்த இரங்கல்கள்!!

No comments :


ராமநாதபுரம் நாடாளுமன்ற தொகுதி முன்னாள் எம்.பி. ஜே.கே.ரித்தீஷ் நேற்று மரணம் அடைந்தார். அவருக்கு வயது 46.

கானல் நீர், பெண் சிங்கம், நாயகன் உள்ளிட்ட சினிமாக்களில் இவர் நடித்து இருக்கிறார். சமீபத்தில் வெளியான எல்.கே.ஜி. படத்திலும் நடித்துள்ளார். முகவை குமார், சிவக்குமார் மற்றும் ஜே.கே.ரித்தீஷ் ஆகிய பெயர்களில் அழைக்கப்பட்ட இவர் கடந்த 2009–ல் ராமநாதபுரம் நாடாளுமன்ற தொகுதியில் தி.மு.க. சார்பில் போட்டியிட்டு வெற்றி பெற்று, 2014 வரை எம்.பி.யாக பதவி வகித்தார்.

இதன் பின்னர் தி.மு.க.வில் இருந்து விலகி, ஜெயலலிதா முன்னிலையில் அ.தி.மு.க.வில் இணைந்தார். தற்போது அ.தி.மு.க.வில் மாநில எம்.ஜி.ஆர். இளைஞர் அணி துணைச் செயலாளராக பதவி வகித்தார். துணை முதல்–அமைச்சர் பன்னீர்செல்வத்தின் மகன் ரவீந்திரநாத் போட்டியிடும் தேனி நாடாளுமன்ற தொகுதியில் கடந்த சில நாட்களாக தேர்தல் பணியாற்றிய ரித்தீஷ் கடந்த 2 நாட்களுக்கு முன்பு ராமநாதபுரம் வந்தார்.

பின்னர் ராமநாதபுரத்தில் அ.தி.மு.க. கூட்டணி சார்பில் போட்டியிடும் பா.ஜ.க. வேட்பாளர் நயினார் நாகேந்திரனுக்கு ஆதரவாக சத்திரக்குடி, போகலூர், மணக்குடி பகுதிகளில் நேற்று காலை முதல் தேர்தல் பணியில் ஈடுபட்டார். மதிய உணவுக்காக ராமநாதபுரம், ஆர்.ஆர்.சேதுபதி நகரில் உள்ள அவரது வீட்டிற்கு வந்தார். சாப்பிட்டபின் அவருக்கு திடீரென நெஞ்சு வலி ஏற்பட்டு மயங்கி விழுந்தார். அங்கிருந்தவர்கள் அவரை உடனடியாக தனியார் மருத்துவமனைக்கு கொண்டு சென்றனர். ஆனால் அங்கு அவரை பரிசோதித்த டாக்டர்கள் அவர் உயிரிழந்து விட்டதாக தெரிவித்தனர். 



இதனையடுத்து அவரது உடலை வீட்டிற்கு எடுத்து வந்தனர். அவருக்கு இதய துடிப்பு இருப்பதாக உறவினர்கள் கூறியதையடுத்து மீண்டும் மற்றொரு தனியார் ஆஸ்பத்திரிக்கு கொண்டு சென்றனர். அங்கு அவரது உடலை பரிசோதித்த டாக்டர்கள் அவர் உயிரிழந்ததை உறுதி செய்தனர்.

இதைதொடர்ந்து ராமநாதபுரத்தில் உள்ள வீட்டில் அவரது உடல் பொதுமக்கள்அஞ்சலிக்காக வைக்கப்பட்டது. அ.தி.மு.க. மற்றும் தி.மு.க.வைச் சேர்ந்த நிர்வாகிகள், தொண்டர்கள் என ஏராளமானோர் அங்கு திரளாக கூடி அஞ்சலி செலுத்தினர். மரணம் அடைந்த ரித்தீசுக்கு ஜோதீஸ்வரி என்ற மனைவியும், ஹிருத்திக் ரோசன், ஹாரிக் ரோசன் ஆகிய 2 மகன்கள் மற்றும் தானவி என்ற 6 மாத பெண் குழந்தையும் உள்ளது.
ரித்தீசின் தந்தை குழந்தைவேலு இலங்கையை பூர்வீகமாக கொண்டவர். நயினார்கோவில் அருகே உள்ள மணக்குடி அவரது சொந்த ஊர்.

தென்னிந்திய நடிகர் சங்கத்தில் இருந்த ரித்தீஷ், நலிவடைந்த கலைஞர்களுக்கு உதவியவர். சில மாதங்களுக்கு முன்பு நெஞ்சு வலி ஏற்பட்டு சென்னையில் உள்ள தனியார் ஆஸ்பத்தரியில் ஆஞ்சியோ சிகிச்சை பெற்றிருந்தார். தற்போது மனைவி, குழந்தைகளுடன் சென்னையில் வசித்து வந்த ரித்தீஷ் தேர்தல் பணிக்காக ராமநாதபுரம் வந்தார். வந்த இடத்தில் திடீர் மாரடைப்பால் அவர் மரணம் அடைந்ததாக உறவினர்கள் தெரிவித்தனர். இந்த தகவலறிந்து அதிர்ச்சி அடைந்த அவருடைய மனைவி மற்றும் குழந்தைகள் சென்னையில் இருந்து ராமநாதபுரத்திற்கு புறப்பட்டு வந்தனர்.

ரித்தீசின் நெருங்கிய உறவினரான அ.தி.மு.க.வைச் சேர்ந்த ஆர்.ஜி.ரெத்தினம் மற்றும் குடும்பத்தினர் அவரது இறுதி சடங்கிற்கான ஏற்பாடுகளை செய்து வருகின்றனர்.


செய்தி: தினசரிகள்

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)

Tuesday, April 9, 2019

தமிழகத்தில் காலியாக உள்ள மேலும் 4 தொகுதிகளுக்கு மே 19-ந் தேதி இடைத்தேர்தல்!!

No comments :


2019 நாடாளுமன்ற தேர்தல் 7 கட்டங்களாக நடைபெறுகிறது. இதன்படி முதற்கட்ட தேர்தல் வருகிற 11ந் தேதி தொடங்குகிறது. தமிழக சட்டசபையின் 18  தொகுதிகளுக்கான இடைத்தேர்தலையும் இந்த தேர்தலுடன் நடத்த முடிவு  செய்யப்பட்டு உள்ளது. இதனை அடுத்து தமிழகத்தில் மக்களவை மற்றும் சட்டசபை இடைத்தேர்தல் ஏப்ரல் 18ந் தேதி நடைபெறும் என தேர்தல் ஆணையம் வெளியிட்டுள்ள அறிவிப்பில் தெரிவித்துள்ளது.


இதுதவிர்த்து தமிழகத்தில் காலியாக உள்ள திருப்பரங்குன்றம், அரவக்குறிச்சி, ஓட்டப்பிடாரம் மற்றும் சூலூர் ஆகிய 4 தொகுதிகளுக்கு வருகிற மே 19ந்தேதி இடைத்தேர்தல் நடத்தப்படும் என தேர்தல் ஆணையம் இன்று அறிவிப்பு வெளியிட்டு உள்ளது.



இதன்படி, ஏப்ரல் 22 வேட்பு மனு தாக்கல் தொடக்கம்

ஏப்ரல் 29 வேட்பு மனு தாக்கலுக்கான இறுதி நாள்

ஏப்ரல் 30 வேட்பு மனுக்கள் பரிசீலனை மற்றும் இறுதி வேட்பாளர் பட்டியல் வெளியீடு

மே 2 வேட்பு மனுக்களை திரும்ப பெற காலஅவகாசம்

மே 19ல் வாக்கு பதிவு


மே 23ல் வாக்கு எண்ணிக்கை நடைபெறும் என தெரிவிக்கப்பட்டு உள்ளது.

(செய்திகள் விளம்பரங்களுக்கு muhavaimurasu@gmail.com மின்னஞ்சல் வழி அனுகுங்கள்;
ஆன் - லைன் ஷாப்பிங் செய்வதற்கு நம் www.muhavaimurasu.in வலைதள பேனர்கள் வழி செல்லுங்கள்)